By: Kimberlei Baldado

Namayagpag si Christlen Carlo Olivares sa nakaraang Provincial Tourism Quiz Bee na ginanap noong ika–22 ng Setyembre 2015 sa Provincial Capitol, Bayombong, Nueva Vizcaya.

Matapos ang mapait na pangalawang pwesto noong nakaraan taon, tinalo ni Olivares ang 34 na iba pang kalahok sa nasabing kompetisyon, dahilan upang siya’y itanghal na kampeon.

Dahil sa kanyang pagkapanalong ito, siya’y kwalipikado sa Regional Tourism Quiz na ginanap naman sa Cabarroguis, Quirino noong ika–24 ng Setyembre 2015, kung saan naman siya nagwagi ng ikalawang pwesto, sunod sa pambato ng Quirino.

Ayon kay Bb. Chrisitne Ordinario, kanyang naging tagapagsanay, kinakailangan lamang umano ni Olivares ng mas matinding pagsasanay upang sa susunod na taon ay siya na ang tanghaling panalo sa rehiyon.

Sa kabuuan, nanalo si Olivares ng walong libo at limandaang piso mula sa mga nasabing patimpalak.